Ya xk’opoj sok stat te kerem

Jtat, la wabon jkuxinel,

bit’il pejt ixim ach’ijteson,

ja’ini iximonix ta spisil stoyolil witsetik;

ya jk’an juch’iyix jtukel te ik’e.

Anojpteson ta awal,

ta swe’tesel te xojobil k’aal

ta sk’ayintayel ta makamak te ka’tele

ta sk’inalil stalel jme’tatik.

Jtat, lajultesbon te jch’ulel

ta yochel ajk’ubal,

ta jujun paxal ek’

atojobtesbon te jbee.

Jokolawal yu’un te ak’ope

te syijubtes te jp’ijilal,

ta xatle sk’inal k’isisetik

ja’me layil te jchi’ele.

Jtat, lom lek te awo’tane;

k’optabil ta k’anjel te ko’tan,

te xt’umt’on ta jujun xch’ijel xojob

ja’ yu’un te sakubel sk’inal jsit.

Ta yan pam lum xk’eluj te jsite,

te lek t’ujbil jk’anjel

ya sjik ik’, xk’ayin, xtujk

yu’un te bombil st’umt’onel o’tanil a’ch’ix.

Jtat, k’ambeya te skanjele,

ya st’ubon sit te yajk’ubal snok’etal,

te sbuts’an yik’ xnichimal,

t’ujbil ya xk’ayinix te ko’tane.

Te yek’ul Xmaruch

xlemlon ta xjaxel te jk’op,

ja’ sbak’etal ta jch’ich’el

te ya xch’ij ta sbak’etal te lum.

Jtat, te stakinal ko’tan ya animajix,

ya xjalajix ta yilel te ch’ulchan,

ts’ibubilix ta jnukelel te k’anjel,

sak chajchaj sbul te ja’

yu’un te ch’ul xojobil balumil.

Te Bats’il Winik jnukulel

nojem ta xlemlom k’anjel,

xtiletnax ta xojobtesel te balumil

bit’il xnichimaj k’optik tseltal.

Jtat, k’ajk’-nax ta k’anjel ko’tan te najem,

ya smakon te sk’anjel, ya speton ta spisil st’ujbilal,

jajnax sbak’etal ta jbak’etale

ya snijktes jch’ulel ta winikon stojil jk’op.