An puulek ajib Santoorom

Ti kinh pakwalantsl, ne’ech tu t’ilstsi juun i t’ilab: Wjiich, juun i pay’lomlaabkwa’, juun beel l n puulek ajib Santoorom, taam u tsi’il ejtal an chemeelom –an aanimas, u usnal– ti cha’bixtsik ti bitsow, putaal n k’imadh. In ulkwa’ an pay’lomlaab:

–Nana’ yab in belaal max u tsi’il in ejatal an chemeelom. Yab in belaal. Yab u tsi’il.

K’ambixtalaabki’i. Nanaa’ yab in jolat, nanaa’ ne’ech tin t’ojnal (in utsaal’ an pay’lomlab nin tomkiil). Nanaa’ ne’ech ku aytsi nu taata k’al juun i kweentu’ k’al i majudh bakan (in ulkwa’). U chu’uumal xin k’apal wi’ik in kw’e’eel i dhalm dhuk. Ja ‘ich ne’ech ku jedhkantsi ban altar (in ulkwa’).

Ani anchankwa’ in t’ajiich.

Alwiich, k’ale ti t’ojnal. T’ojon putaal a k’itsaa, juun beel aal an puulek ajib Santoorom –ja’ich an apktm, anh pkeeltsik, aval jidhtal an chakam, u usnal. Tsudheech. K’ale ti t’ojnal. Exomkwa’ ti t’ojnal chapik, ani jik’towaal in ach’aa’kwa’ i beelaltsik u t’ilom ti beel. U wat’el wi’ik yaan. Kulbeeltsik ne’ech wi’ik. Juuntsik u ajat, k’e’et u bixneel, kulbeeltsik. Ani in chu’uuchkwa’ u wat’el wi’ik yaan, pamattsik ti eex ani in kitaamkwa’tsik i t’oknal. Ejtal in juunaal wi’ik an ch’ejwaxtalaab, an pikbastalaab xi jajaa’tsik in bach’uum wi’ik. Juunhtsik in ne’dhaal wi’ik i it’adh juntsik te’, k’e’et in ne’dhaal wi’ik ti k’elab i it’adh. An mlimlab ne’ech wi’ik in paamaam i eex k’al an t’u’uch –pakdha’ ani ts’itsik t’u’udh in ne’dhaal wi’ik.

K’e’et in ne’dhaal wi’ik an yuuj, paamam wi’ik i muul, jaarru in ne’dhaal wi’ik. K’e’etwa’ in ne’dhaal wi’ik i way’, palbidh. Ejtaltsik u kulbeel ne’ech wi’ik.

Taam an inik in chaalpaykwa’:

–U chu’uumich xi jachantsik yab i beelal, anik’i, abal yab u exlaal, ne’ech ke’e’et i pay’ lomlaabtsik xi ewejich in chu’uum. Ch’oontaal nu taata (in ulkwa’). Tee’ xoonm tal nu taata.

Tin chalpantsi taalkwa’ nin taata.

Yab oowpineek tin chu’u ti taal nin taata k’al naana. In ne’dhaal wi’ik nu taata in okbaam in kw’e’eel i dhuk, jelt i midhidh. Nin naana in paamaaam an kweentu’ k’al anh maajudh bakan, putsut sudh xan ti anchan in ne’dhaal xi kw’ajey. Jachantsik in juunaal wi’ik. An pay’lomlaab t’e’pin.

–Xoo’ u beliich, ejtal an chemeelom, ejtal an aanimas u tsi’il (in ulkwa’).

Taam an inik in tawna’ kwa’, in utsaal:

–Taata, taata, naana, naana (in ulal). Nanaa’ u lee’ tin kaaw k’al tataa’. Nanaa’ yab u belaal wi’ik. Tin kin pakwlaantsi. Nanaa’ yab u cho’oob wi’ik max ne’ech ki tsich ti kin cha’biy. Xoo’ u chu’tal abal lejich lej. Tin kin t’ajtsi ti alwa’talaab ti kin aytsi juun wee’. Nanaa’ neey ku t’aja’ juun i puulek pikbaxtalaab. Xoo’ u cho’oobich abal u tsil’il lej.

–Pero yab i ejtowal (took’on in taata). Nanaa’ in ne’echich, wawaa’ u ne’echich. Abal max a lee’ (in ulal) tin chu’u aani tin jiltsi an pikbatalab, ka t’ajiich, tu aytsal tuu’ wi’leb tyoopan, Tuwa’ tu aytsal kalaam, taam yab beel tujenek an misa.

Alwiich, taam ja’ichkwa’ in t’aja’ an pay’lomlaab. Witsiy tin k’imaa, in chemdha’kwa’ i olom, i chemdha’kwa’ i pita’. In t’aja’ an tu’udh pakdha’. In kw’ajba’ an altaar. Exmaach ti t’ojojool an pikbaxtalaab putaal i akal, abal taaam ka tsuchey, ne’ech kin t’aja’ an olaab. Ne’ech kin oolantsi in ejatal an taatatsik.

Taamkwa’ kin ok’oy ti t’ojojool, in ach’a’kwa’ abal chekenek ti kw’aj. In utsaalkwa’ nin tomkiil:

–Ne’ech tin koyol (in ulkwa’). Anchan, taam ka tek’ech an t’u’udh, ka leka’ ani ti kin utsa’. Taam ka ok’oy, ti kin bakiy (in ulkwa’). Ne’ech ki kaniy an ool, ne’ech ki oolantsi. Ne’ech ki akiy an pikbaxtalaab tuwa’ xoon ti ne’ech ti kin aytsi nu taata.

Ani an inik k’alekwa’ ti koyol tin waytal. Koyooch. Komo juun ioora k’ale ti tawnaab, pero an pay’lomlaab yabiichkwa’ ejat. Chemnekichkwa’ ti kw’aj wi’ik. Chemech. Chemech bin waytal.

Taam an miimlaab in chu’u chemnekich nin tomtal, in wiltsi an k’imaaadhtsik, in ja’uubtsik. An t’u’udhtsik xi t’ajan abal in taata’tsik, in k’apu’tsik xi tolmixin ti joolim an chemeelom. Anchankwa’ ti ok’on jee’ i t’ilab. Jalbintsiich.