Utia’al in paktikech

Kin wilikech ti’ k’u

tu’ux ku ch’í inil k’iin u tsu’uts’ mantats’il,

yéetel ku yóok’ot’ in ki’imak óolal,

ku bonik’ a t’aan layli’ ku juum.

Ku ts’áaik nib óolal ti’ k’ujo’ob tia’ano’ob ich teen,

je’ebix ka’an ti’ ch’íich’o’ob

yéetel lu’un ti’ u amal ch’aj k’iinil to’on.

Nool e’esten tuka’aten k’uyen tuunich

tu’ux ajmiatso’ob tu xoko’ob k’iin,

yéetel tu yilo’ob u xíimbal yáax k’iin

yéetel u wi’ij sáak’o’ob tu tojil muun kool;

tu’ux tu yilo’ob cháak u jáaxtik lu’um,

u ma’bukil káakab lu’um,

tu’ux tu wilo’ob nalo’ob

tun yóok’oto’ob tu k’aay yúuyum

ix bu’ul ku méek’ik u wíinklal nal

tak u tak’ankúunsik alab óolal.

In k’aat le tuunicho’,

tia’an ka’ach ta wiche’,

tu juum a kaal.

Bejla’a tia’anech tin k’a’ajasaje’,

kin patik sujuy t’aano’ob

uti’al in paktikech;

kin ts’áaik’ junp’éel tuunich tu yóok’ol a na’anil,

kin kajsik ak k’u,

ken lóolankinak u samchakil juul sáastal tu ka’anlile’

bin na’akak ba’alcheo’ob u yuk’o’ob sáasil.

Kin che’ej

tuyo’sal a sáastal láalaj áak’ab ku yajal,

tuyo’sal u ta’ujil a tan pool,

boox éek’ tu chúumuk a sáasile’

tu jojopansaj u ch’ujuk ejoche’enil.

Nool

ko’ox báaxtik táan k pak’ik k’ujo’ob

yéetel bin síijik ya’axche’ob

ut’al u ts’áaik u k’u’ éek’o’ob.

Ko’ox báaxtik tan k-pak’ik muyalo’ob

yéetel bin xíitik yáalkab ja’ob,

bin ch’eene’nak paakato’ob ja’il

u pa’to’ob u na’at’al u paach Kukulkan meen k’áak’,

u pa’to’ob u paktikubal lx Chéel tu újil néen,

yéetel Cháak u meent u léembal u jaats’,

ix tuláakal le k’ujo’oba’,

yéetel in xáak’abo’ob,

nats’ko’ob u suto’ob ja’ yáalkab k’aa’ iim,

u suto’ob súutuk kaab yéetel waaj.

Ko’ox k’aay je’ebix k’áax

ken u yu’u u popokxiik’ k’iin ich ch’íich’o’ob,

papaxk’abnako’on ye’ebix k’áaxal ja’ tu chuun u nak’ Mayab,

ok’onak’o’on,

teech te’elo yéetel yasab way tene’,

teen in machminbal ti’ le súutuka’,

ok’onako’on

tuyo’sal jach ya’ab sáastal.vientre dle a de Kukulk